Fréttir

Sunnudaginn 8. nóv. verður barna- og fjölskylduguðsþjónusta í Hrísey kl. 14.00.  Líf og fjör, sögur og söngvar JSr. Magnús og sr. Oddur leika við hvurn sinn fingur. Munið – það er ekki nauðsynlegt að eiga barn eða vera barn til að hafa gaman – sjáumst!!!! J

ATH breytta áætlun frá 1. nóvember. Sjá hér

Á næsta ári eru 110 ár síðan formlegt skólastarf hófst í Hrísey. Við í Hríseyjarskóla hyggjumst fagna þessu m.a. með glæsilegri árshátíð á sumardaginn fyrsta þann 21. apríl. Við höfum áhuga á að kanna vilja fyrrverandi nemenda til að fagna með okkur. Hvað viljið þið gera í tilefni afmælisins? Er þetta rétti tíminn til að fagna með fyrrum skólafélögum?

Fyrsti grautur vetrarins verður laugardaginn 31. október. Við verðum í Hlein í hádeginu eins og venjulega. Allir velkomnir.

Helga Íris Ingólfsdóttir hefur verið ráðin verkefnisstjóri brothættra byggða fyrir Hrísey og Grímsey. Helga Íris var valin úr hópi margra hæfra umsækjenda, en alls sóttu 13 um starfið.  Helga Íris er 37 ára, fædd og uppalin á Dalvík. Hún er stúdent frá MA, lauk BSc prófi í umhverfisskipulagi frá Landbúnaðarháskóla Íslands á Hvanneyri árið 2011 og stefnir á að ljúka meistaragráðu í skipulagsfræði frá sama skóla um næstu áramót. Helga Íris er búsett á Dalvík en mun hafa aðstöðu á skrifstofu sveitarfélagsins í Hrísey. Helga hefur margskonar starfsreynslu sem nýtist henni í nýju starfi. Hún vann meðal annars á umhverfissviði Dalvíkurbyggðar í fimm ár og hefur reynslu af stjórnsýslunni og því að stjórna verkefnum sem ólíkir aðilar koma að. Helga er sérstök áhugamanneskja um íbúalýðræði og tækifæri fólks til þess að hafa áhrif á samfélag sitt og umhverfi.

Þorrablótið í Hrísey 2016 verður haldið laugardaginn 13. febrúar. Endilega takið daginn frá.

Þorrablótið í Hrísey 2016 verður haldið laugardaginn 13. febrúar. Endilega takið daginn frá.

ATHUGIÐ.Frá miðvikudeginum 23. september til fimmtudagsins 1. október verður Hríseyjarbúðin opin frá kl. 15:00 - 18:00.  Engin hádegisopnun þessa daga.

Fyrsti fundur nýskipaðrar verkefnisstjórnar í verkefninu „Brothættar byggðir“ í Hrísey var haldinn s.l. fimmtudag, 10. september. Á fundinn mættu fulltrúar Byggðastofnunar, Akureyrarbæjar, Atvinnuþróunarfélags Eyjafjarðar, Eyþings og íbúa í Hrísey. Rætt var um stöðuna í Hrísey bæði hvað varðar atvinnulíf og samfélag og um skipulag samstarfsins framundan. Fundarmenn voru sammála um að taka upp þráðinn frá málþingi sem Áhugahópur um framtíð Hríseyjar stóð fyrir haustið 2013. Þar var rætt um margvísleg mál sem snertir Hríseyinga og full ástæða þykir til að fylgja eftir.

Ungmennafélagið Narfi stendur fyrir viðburðum í tilefni af Hreyfiviku UMFÍ dagana 21.-27. september. Þeir sem mæta á viðburð geta skrifað nafn sitt á miða sem fer í lukkupott. Dregið verður úr honum á sunnudeginum. Því oftar sem þú mætir, hreyfir þig og tekur þátt, því meiri eru vinningslíkurnar!