Umf. Narfi fær pening að gjöf til að stofna rafíþróttadeild
Ungmennafélagið Narfi í Hrísey á marga velunnara sem styðja við félagið á ýmsan hátt. Menja ehf, sem er í eigu hjónanna Árna Ólafssonar og Elínar Árnadóttur hefur styrkt félagið um rúmar 2 milljónir króna til að kaupa búnað og allt það sem þarf til að stofna rafíþróttadeild fyrir börn og unglinga í Hrísey. Keyptar verða 5 fullkomnar tölvur, skjáir og fylgihlutir ásamt PlayStation 5 leikjatölvu og er áætlað að rafíþróttaæfingar hefjist á næstu vikum. Elín, sem ólst upp í Hrísey, tilkynnti um styrkveitinguna á Grautardegi í Hrísey í dag.
Áhugi á rafíþróttum hefur farið vaxandi á undanförnum árum þar sem áhersla er lögð á að tvinna saman tölvuleikjaspilun, hreyfingu og heilsu og munu krakkar í Hrísey nú fá tækifæri til að æfa rafíþróttir við bestu mögulegu aðstæður. Samstarf verður við rafíþróttadeild Þórs á Akureyri varðandi útfærslu á starfinu.
Við í stjórn UMF Narfa eigum ekki orð til að lýsa þakklæti okkar fyrir hönd félagsins en færðum Ellu blómvönd með þakklætiskveðjum til þeirra hjóna við þetta tilefni.
